السلام عليكم محبى المشاريع المربحة
انهارده ان شاء الله هقولكم ازاى تكسبوا 2500 جنية من الحمام شهريا قابلة للزيادة حسب مجهودك وحسب بدايتك
أولا كده هديك فكرة صغيرة عن الحمام
الحمام هو طائر داجن مستأنس، يربيه الإنسان منذ القدم لغرض الربح أو الهواية.
الحمام منه أنواع كتير وأشكال كتير وكل نوع ليه سعر.
انهارده بقى هعرفك ازاى تكسب من الحمام بطريقة سهلة جدا وبرأس مال 2000 جنية فقط
أولا وقبل كل شئ يجب أن توفر مكان لتربية الحمام وهذا المكان يجب أن يكون نظيف أمن بعيد عن الفئران والعرس والقطط.
نيجى بقى للحمام اللى هنشتريه:
زى ما قولتلك فيه أنواع كتير من الحمام وكل نوع ليه سعر وأسعار الحمام دلوقتى كمان غالية ، طب ازاى هكسب من الحمام برأس مال 2000 جنية بس؟
أقولك احنا هنشتغل على نوعين فقط من الحمام, نوع رخيص ونوع غالى والمكسب طبعا هيكون فى النوع الغالى.
المطلوب:
1- حضرتك هتشترى 5 أزواج حمام بلدى سعر الزوج 40 جنية كده يبقى 200 جنية.
2- هيتفضل معاك 1800 جنية تمام كده , بص بقى هتروح تشترى 5 أزواج حمام اسود غزار سعر الزوج من 300 الى 350 جنية , لو فرضنا ان الزوج ب 350 جنية يبقى ال 5 هيعملوا 1750 جنية.
3- ال 50 جنية اللى هتفضل ممكن تشترى بيها زوج حمام بلدى كمان أو تشترى بيها أملاح معدنية وفيتامينات للحمام.
طيب دلوقتى ياعم انا سمعت كلامك واشتريت الحمام و بقى عندى 10 أجواز حمام قولى بقى هكسب منهم ازاى
اصبر على يابولسان طويل / القرموطى/
دلوقتى يامعلم الحمام الغزار ده حضرتك مش هتخليه يرقد عالبيض بتاعه, لا دول بشوات
حضرتك هتخليهم يبيضوا بس والبيض بتاعه هتخلى الخدامين اللى هما الحمام البلدى هما اللى يرقدوا عليه وكمان يوكلوا ولادهم.
العملية دى بقى يا نجم اسمها ( التحضين )
بعض ما تحضن البيض بتاع الغزار باسبوع هتلاقيهم باضوا تانى يبقى انت كده عندك بدل بيض 5 أجواز غزار عندك بيض 10 اجواز غزار.
فى الحالة دى بقى يا معلم هيبقى عندك 5 اجواز بلدى راقدين على بيض 5 اجواز غزار و 5 اجواز غزار راقدين على بيض كمان 5 اجواز غزار, الله أكبر عليك
ال 10 اجواز اللى هيطلعوا دول ان شاء الله بعد 17 يوم اذا كنت فى صيف أو 22 يوم اذا كنت فى شتاء, حضرتك هتسيب اهليهم توكلهم لمده 4 أسابيع...
أيه أريع اسابيع يعنى انا هقعد شهرين عشان أجيب ال10 اجواز دول؟؟
لا يابو لسان طويل.
خلال ال 4 أسابيع اللى الحمام بيوكل فيه ولاده بتلاقيه باض تانى ورقد عالبيض, يعنى الحمام هيكون بيوكل ولاده وراقد عالبيض فى نفس الوقت.
جميييييييل
نيجى بقى نشوف احنا كسبنا كام فى الليلة دى كلها...
نحسب احنا دلوقتى اشترينا الحمام ب 2000 جنية وده رأس المال
الحمام قعد عندنا قول شهرين لحد مانتج ووكل زغليله, قول أكل 30 كيلو كلفة فى 6 جنيه يبقى كل ب 180 جنية هو وولاده.
يبقى كده احنا صرفنا 2180 جنية.
نشوف المكسب بقى احنا دلوقتى معانا 10 ازواج زغاليل غزار لو جينا نروح نبيعهم فى السوق الزوج الواحد مش هيقل عن 250 جنية ده لو معرفتش تبيعه ب 300. لو حسبنا 250 فى 10 يبقى معانا 2500 جنية فى أول شهر , جميل يبقى احنا كسبنا 320 جنيه فى أول شهر ولسه رأس المال زى ما هو.
نيجى فى تانى شهر بقى يا معلم تلعب معاك لانك هتبيع ال 10 اجواز ومكسبهم هيكون صافى معاك ومش هتكون صرفت غير ثمن الأكل بتاعهم يعنى انت كل شهر هتبيع ب 2500 جنية حمام وانت باشا ابن باشا.
اي خدمة .. شير بقى
