أهم وأخطر الأمراض التى تصيب حيوانات المزرعة وكيفية علاجها

كما وعدناكم بعمل موضوع مفصل بالأمراض والحالات الشائعة في حيوانات المزرعة وكيفية علاجها مع عدم التعرض للأمراض الفيروسية اللي لازم طبيب متخصص يتابعها ويعالجها بنفسه
إليكم هذا المنشور نتيجة التجارب الشخصية لهذه الحالات وعلاجها والاستعانة بالسادة الأطباء المتخصصين وعلى رأسهم دكتورنا دكتور بيت العيلة الدكتور نزيه نعيم سائلا المولى جل وعلا أن يجعله في ميزان حسناته

بسم الله نبدأ:
1_ البرد
رشح وسيلان من الأنف + كحة أو عطس وممكن يصاحبه سخونية
العلاج البيطري
_هيستاكيور 1سم / 20 كيلو لحم حي لمدة ثلاثة أيام
_ديكساميثازون 1سم / 20 كيلو لحم لمدة ثلاثة أيام
وفي حالة العشار لا يستخدم الديكساميثازون ويستبدل ب فيلونيدين بيطري
وإذا وجد ارتفاع لدرجة الحرارة يستخدم ديكلوبريما 1سم لكل 50 كيلو لحم + أوكسي تتراسيكلين 20% ط.م 1سم يوم بعد يوم لكل 20 كيلو لحم
العلاج البشري
_أمبول أفيل بشري
_أمبول ديكساميثازون وفي حالة العشار يستبدل بميلوكام
وفي حالة وجود ارتفاع في درجة الحرارة
أمبول سيفوتاكس 1جم + أمبول ديكلوفين لمدة ثلاثة أيام

2_ الإلتهاب الرئوي
كحة باستمرار + سيلان مخاطي من الأنف قد يصاحبه دم + نهجان + خمول وقلة الشهية
العلاج بيطري فقط
_إنروفلوكساسين + تايلوزين لمدة ثلاثة أيام
_فينادين حقن بالعضل لمدة ثلاثة أيام
_هيستاكيور حقن بالعضل لمدة ثلاثة أيام
_فيروسمايد حقن بالعضل مرة واحدة فقط
ملحوظة : أي نعم الدراكسين هو الحل السحري للالتهاب الرئوي بس رأيي بناءا عن تجربتي المتواضعة حاول متجيبش أخرك مع الحيوان على طول يعني ابدأ معاه العلاج تدريجي

3_ الإسهالات

الاسهالات ليها أسباب كثيرة وأنواع كثيرة

العلاج للرضع من الأبقار والجاموس حتى وزن 150 كيلو
_ قرص نيومايسين بيطري + 10 جرام سلفاديمدين بودرة 20% + 5 قرص ستربتوكين بشري + 50 جرام نشا + 2 كيس محلول معالجة الجفاف بشري
لمدة ثلاثة أيام

العلاج للحيوانات الكبيرة
_أوكسي تتراسيكلين 20% ط.م 1سم / 20 كيلو لحم
_سلفاديمدين 1سم / 10 كيلو لحم
_أد3ه 1سم لكل 10 كيلو لحم
_محلول معالجة الجفاف

بالنسبة للماعز والأغنام الرضع
_كابكت مركب بشري 10سم
_فلاجيل شراب بشري 10سم
_محلول معالجة الجفاف

4_ حمى الدم

الأعراض الشائعة
سرعة ضربات القلب + دموع في إحدى العينين أو كلاهما + قلة شهية خاصة للعلف المركز + ارتفاع لدرجة الحرارة
السبب الأساسي تمكن القراد من جسم الحيوان

الوقاية
أمبول انتروبار بيطري يحل على 12.5 سم ماء لكل 300 كيلو لحم حي
كل 6 شهور للوقاية
العلاج
أفضل علاج أميزول بيطري حقن 1سم لكل 100 كيلو لحم حي + أوكسي تتراسيكلين 20% ط.م يوم بعد يوم لمدة ثلاثة مرات

5_الطفيليات الداخلية والخارجية

الديدان ليها أنواع كتير وأعراض كتير ذكرها دكتورنا الدكتور نزيه في منشور مفصل عن كل أنواعها هنتكلم هما للوقاية منها
_أيفوماك سوبر 1سم لكل 50 كيلو لحم حي
_شربة بندازول 10% 1سم لكل 10 كيلو لحم حي
تكرر الجرعة بعد 14 يوم من الجرعة الأولى
ويكرر العلاج بجرعتيه كل 6 شهور

وفي الوقاية في حالات العشار
_ديكتوماكس حقن عضل 1سم لكل 50 كيلو لحم حي
_شربة هيباديكس 25 سم لكل 100 كيلو لحم حي
أو شربة ليفافلوك 2.5 سم لكل 10 كيلو لحم حي
ويراعى تكرار الجرعة كما ذكرنا

6_ اللكمة
علاج اللكمة وزيادة نسبة الحموضة في الكرش
_ منع الماء
_تجريع كيس لاكسفيت / لتر ماء
_معلقتين بيكربونات على شوية مياه وتجريعهم بالفم
_حقن كالسيوم
_حقن فسفور
تقديم عفش أرز أو غلاف ذرة أو دريس ناشف

7_ الجرب والقوب والطفيليات الخارجية
العلاج
_ديكتوماكس حقن بالعضل 1سم لكل 50 كيلو لحم ويكرر بعد 14 يوم
دهان
مرهم كبريت 5% + 10 جرام كبريت جمال (من عند العطار)+ 5 قرص اسبرين اخضر (ريفو) + مرهم جراميسين بشري

يتم خلط كل المكونات على بعضها وتدهن الأماكن المصابة يوميا

8_إلتهابات الحوافر

التهاب في الحافر يسبب صعوبة في الحركة والعرج

العلاج
_غسيل الحوافر جيدا بالسبرتو الأحمر
_بخاخ موضعي مضاد حيوي أوكسي
_فينادين بيطري حقن
_ بن سترب حقن عضل

9_ التهاب المفاصل

إلتهاب في مفاصل الحيوان أو كدمات نتيجة لخبطة تؤدي إلى العرج وصعوبة الحركة
العلاج البيطري
_ديكساميثازون أو فينادين أو ميتاكام أو كيتوبروفين حقن بالعضل

العلاج البشري
_ديكساميثازون أو ميلوكام

ملحوظة : الديكساميثازون لا يستخدم في حالة العشار

10_ ضعف الشهية وعدم الإقبال على الأكل

ملاحظة ضعف شهية بعض حيوانات القطيع أو بتاكل والأكل مبيبانش عليها
العلاج
_تجريع للديدان كما ذكرنا سابقا
_فسفوفورت حقن عضل لمدة ثلاثة أيام
_أد3ه حقن عضل لمدة ثلاثة أيام

إضافة الخمائر والفيتامينات اللازمة على الأعلاف
وضح حجارة أملاح للحس أمام القطيع

11_ برود وضعف الطلوقة

عندي الكبش أو التيس الطلوقة بارد ومبيكشفش الغنم أو المعيز وضربه بقى عزيز
العلاج
_ه+ سيلينيوم حقن عضل 1سم / 10 كيلو لحم
_أد3ه حقن عضل 1سم / 10 كيلو لحم
_أدينوبلكس فورت بشري أمبول يوم بعد يوم

وبعد انتهاء العلاج
يحقن 2 أمبول تستوستيرون بشري مرة واحدة
ملحوظة : بعد العلاج ده استخبى من الطلوقة وخاف على نفسك ههههههههههههههههههه

12_ إلتهاب الجهاز التناسلي للطلوقة

الطلوقة عندي بينزف دم من حليله وعنده ورم
العلاج
_حقن أموكسي سيلين بيطري 1سم لكل 20 كيلو لحم
_حقن جنتاميسين بيطري 1سم لكل 20 كيلو لحم
_حقن فيلونيدين بيطري 1 سم لكل 20 كيلو لحم

13_ السحابة البيضاء والتهاب العين

بداية الأمر بنزول دموع غزيرة من إحدى العينين أو كلاهما
+ زهور التهابات واضحة في العين ثم تزهر سحابة بيضاء على العين

العلاج
الطريقة الأولى وهي الخزام يقوم بهذه العملية غنام محترف

العلاج الموضعي
_ قطرة ديكساترول بشري أو توبراديكس
_ حقن أد3ه بالعضل

منقول من بيت العيله للإنتاج الحيواني
.......بوست للأمراض والعلاجات .......
منقول من عند الاخ محمد سنيور.

مرض الادينو فيرس الذي يصيب الدجاج

كلامنا اليوم عن فيرس رخم جدا بيحل ضيف على المزارع المصرية وشفتة فى بعض الزيارات لاحدى دول الخليج فى الفترة اللى فاتت

الا وهو

مرض الادينو فيرس وطبعا فيرس الادينو لة صور كثير

هكتب اللى اقدر علية الان ولو لقيت اقبال على البوست هكمل الجزء التانى بامر الله فهل مهتمين بالمنشورات اللى من النوع دا

وانواع كثير تقريبا 12 سيروتايب اى 12 نوع مصلى

وال12 نوع دول تبع مجموعة واحدة

وفية غيرها مجموعتين كمان

منها المجموعة الثالثة اللى تبعها فيرس انخفاض البيض EDS

لكن المنتشر هو النوع النوع الكبدى ذو الاجسام الاحتوائية او ما يسمى

(inclusion body hepatitis (IBH

اولا المرض بيتنقل من الام الى الكتاكيت يعنى بيتنقل راسى

وبكل اسف صعب انك تقول لصاحب الكتاكيت ان كتاكيتك مصابة

عارف لية؟

لان حتى لو الام مصابة وانتجت كتكوت مصاب مش بتظهر الاصابة الا على الاسبوع الثالث لو المناعة كويسة

ولو الكتاكيت مناعتها ضعيفة بتظهر بعد اليوم 15 الى 20 ودا شفناها حقليا كثير

يعنى مفيش حاجة اسمها الكتكوت بتاعى اول اسبوع دا الكلام دا فى الامراض الثانية وليست الادينو فيرس دا

الفيرس طبعا من النوع الغير مغلف لة شريطتين من الDNA

هقولك على ارخم شوية حاجات فى الفيرس ومش هتلاقيهم فى باقى الفيروسات اللى بتصيب المزراع

ف تلاقية مقاوم للحرارة يعنى تخيل لغاية حرارة 60 درجة ولمدة 30 دقيقة بردة بيقاوم يعنى بيظهر صيف وشتا

تلاقية بيقاوم الحمووضة والقلوية يعنى معاك من 3 حتى 9 PH

يعنى تنزل مضاد سموم يرفع النافق على طول

وتنزل مضاد قلوى بردة يرفع النافق اكثر

بيقاوم جدا المذيبات الدهنية

ممكن الكتاكيت المصابة تقد تفرز فى الفيرس مع الزرق لفترة بدون ان تظهر الاعراض عليها

طيب تعالى ندخل على قطيع مصاب بالفيرس ونشوف هنلاقى اية؟

خمول فى القطيع

نافق بدون اى مقدمات

وقفة للطير مع تغميض فى العين او بيسموها تقليص حجم العين

ولما تحرك الطير يفضل واقف مكانة

بعض الحالات اسهال بنى او محمر

ولان الفيرس بيعمل انيميا ف تلاقى الطير وشة باهت والعرف والدلايات شاحبة

اما التشريح ف كلام كثير جدا

وانا هسيبك صور تحت احسن لان الكلام فى التشريح كثير جدا

من كبد متدهن وكبير فى الحجم ومنقط الى قلب محاط بكيس ماشى يصل الى 20 مل مية لكل طير حول القلب

الى اعراض تنفسية

الى وضعية البيض الكاذب يعنى الفرخة تعمل نفسها بتبيض ومفيش بيض ولا حاجة

صعف نمو مش طبيعى وسردة كثيرة بسبب ان الفيرس بيضرب البنكرياس وبيفقد انزيماتة الهضمية زى ما بيحصل فى الريو فيرس

تفتح طير مضاب بالمرض تلاقى البيرسا صغيرة جدا بشكل ملحوظ

تقرحات فى القونصة زى اللى بتحصل فى السموم

قمة شدة المرض بعد 4 الى 7 ايام من بداية الاعراض لدرجة انك ممكن تدخل عنبر تلاقى نافق من 5 الى 10% نافق مرة واحدة وبسرعة لو كانت الفراخ مناعتها ضعيفة والفيرس تترة عالى فى الدم

العلم بيقول ان اكثر مكان بيصيبة الفيرس هى بطابة القناة الهضمية

بعدها يحصل فيريميا

يعنى الفيرس يمشى فى الدم

واول ما يمشى فى الدم بيصيب كل الاعضاء كما وضحنا سابقا

بص بتلاقى العنبر ماشى طبيعى وبعدة شوية تلاقى استهلاك العلف قل

وشوية وتلاقى خمول مش طبيعى وبعدين يبدا النافق

تشريحيا هو مشابة للجمبورو جدا من حيث انزفة الورك والصدر وكمان ضمور البيرسا

ومشابة للانيميا بسبب اصابة نخاع العظام وبالتالى بيقلل جدا فى كرات الدم

بيمهد جدا ان يجى وراة فيرس الانيميا

اما الجمبورو ف هو اللى بيمهد لة ان يدخل وراة

بيعمل فى الكبد

basophilic inclusion bodies in

the hepatocytes

فتلاقى الكبد فى غالبية النافق واخدة اشكال غريبة هسيبلك صور تحت بيها

فى بعض الحالات ممكن النافق يقعد من 3 الى 5 ايام ياخد 10% من القطيع

بسرعة جدا ويقف لوحدة

العنبر اللى رعايتة مش كويسة وفية اجهاد مناعى او اجهاد تربية بيكون اكثر العنابر اصابة

فترة حضانتة ممكن بعد 24 ساعة وممكن 48 ساعة

وممكن اعلى قليلا يعنى نافقة سريع جدا

طبعا المرض يعنبر مثبط مناعى زى الجمبورو والانيميا ف تلاقى دايما بيفتح الباب لامراض تانية اهمها الكولستريا وخاصة اللى اسمها التهاب الجلد الغرغرينى وايضا بتظهر كثير الكولستريديا التقرحية بعدة

الفيرس دا مقاوم لكل حاجة زى ما قولنا حرارة حموضة مذيبات لكنة حساس جدا للفورمالدهيد

يعنى تطهر عنبرك كويس ب الفورمالين تتقى شرة

فعلا اكبر مصيبة فى الفيرس دا حتى لو دخل خفيف ونافقة خفيف انة بيدمر البكيرياس ف بيبهدل النمو التحويل وعملية التسمين كلها

وهسيب لحضرتك صورة ل بنكرياس مصاب

الغريب ان تلاقى كلية مصابة وبيرسا مصابة وعضلات عليها انزفة وتعتقد انة جمبورو ولما تعمل الاختبارات المعملية تلاقية ادينو فيرس

هسيبك صورة تحت جاية من رسالة علمية اجنبية تبين هزال عضلة الصدر وشحوب نخاع العظام والبطش الدموية على الورك

فعلا مرض واخد من اعراض كل الامراض التشريحية

انا اسف جدا على الاطالة

انا لسة عاوز اكمل شوية كلام علمى وحقلى عن المرض بس الناس هتزهق من الاطالة ف نخلية فى الجزء المقبل بامر الله تعالى

اللهم اجعل عملنا هذا خالص لوجهك الكريم

مع تحياتى وشكرا

مهندس عاطف عبد الدايم